Editorial Revirada nº8 “Ciberfeminismo(s)” ⋆ Revirada

por Revirada Feminista

Neste novo número, o terceiro já que vê a luz desde que começou a pandemia da Covid, apresentam-se reflexões sobre os ciberfeminismos, o ativismo que se move na realidade virtual, com toda a sua diversidade e, portanto, complexidade.

Pensávamos que íamos receber propostas que alimentassem o confronto e a polaridade entre o feminismo físico e o virtual. No entanto, o que nos encontramos, talvez devido à situaçom de reclusom continuada e, portanto, necessidade de acelerar um iminente processo de digitalizaçom da sociedade – ocidental principalmente, mas nom só – foi algo mais tranquilo e reflexivo.

O debate e a construçom de discurso e açom feminista já nom é tanto umha comparativa absolutista do que é melhor ou pior, de escolher e validar umha opçom por cima da outra. Fica insuficiente a idealizaçom de um passado físico e corporal de camaradagem feminina perfeita, em que nos olharmos, tocarmos, ou sentirmos umhas às outras era o principal espaço de pensamento e açom. Embora conscientes, talvez mais do que nunca, da sua importância na nossa saúde coletiva e pessoal, reconhecemos, que de facto, a participaçom e assistência a atos presenciais – antes da pandemia – estava a ser cada vez mais complicada, menos numerosa e com menos capacidade de criar laços pessoais e políticos. Mas as reflexões atuais também nom conectam com a sobrevalorizaçom das ferramentas digitais de um ativismo quebra-fronteiras de clique imediato, onde todas as mulheres podemos, aparentemente, participar democraticamente no feminismo e na sociedade. Se bem que, é inegável, a Internet tenha permitido umha certa atividade durante este último ano, nom conseguiu transformar-nos, nem resolver os problemas que já tínhamos.

O diálogo entom que se apresenta nas propostas visuais, literárias e políticas deste número 8, desenvolvem-se à volta de como é que se está a utilizar este espaço de comunicaçom e açom. Se, por acaso, se está a tirar proveito do inovador formato eletrónico para criar e construir realidades fora das dinâmicas heteropatriarcais, ou se polo contrário apenas estám a ser reproduzidos os mesmos estereótipos homem vs mulher, mudando ligeiramente, se calhar por umha aparência e estética moderna e chique, mas vazia.

Encontrar o equilíbrio entre o mundo “natural” e o “artificial” – ambos os conceitos tam humanos – é algo sempre sugestivo, e a possibilidade de fazer umha escolha, do que mais nos interessa de um e do outro lado, pode ser realmente o que contribuirá para fazer a nossa vida melhor. Cá nesta revista que têm entre as mãos ou em frente do seu ecrã, encontramos algumhas dessas experiências, ideias, reflexões no âmbito da arte, fotografia, sexualidade, ativismo coletivo e consciência pessoal e política, que nos farám pensar, e com certeza encontrar algumhas respostas, e desejavelmente, muitas outras novas dúvidas e perguntas.

Nesta primavera de 2021 há com certeza muitas companheiras no feminismo a quem poder dedicar este número, a quem reconhecer o esforço em adaptar-se para continuar com a resistência feminista. Enquanto pensávamos nisto olhamos para nós próprias, sobrevivendo a esta pandemia como projeto de mais de 5 anos, acolhendo novas companheiras, e dizendo temporariamente adeus a outras, sem nos podermos abraçar, falar e sentir fisicamente. Habituadas, sim, pois o ciberativismo é parte inata da Revirada, mas tendo agora que fazer da comunicaçom eletrónica a nossa única e principal fonte de criaçom e relacionamento, sem contar com a energia que as atividades presenciais entre nós e com a comunidade de colaboradoras e leitoras da Revirada nos dava.

Por isso, este número quer visibilizar a equipa editorial da Revirada, as que sustentam o dia a dia, o trabalho de ideaçom, montagem e organizaçom da revista, quer dizer, o trabalho reprodutivo e menos glamoroso. E deste jeito dedicá-lo também a todas aquelas que se encarregam destas tarefas nos seus coletivos e iniciativas feministas.

Desfrutem desta viagem feminista connosco, virtual, através da nossa web e redes sociais, e física, lendo-nos na revista em papel que podem encontrar nos pontos de venda mais próximos ou subscrevendo-se anualmente à Revirada.

EDITORIAL E CAPA

Editorial por Revirada Feminista

Capa por Francisca Dan

Contracapa por Ana Velozo

SABIAS QUE?

Sabias que? O que somos / O que nom somos na Revirada por Revirada Feminista

POLÍTICA E SOCIEDADE

Aliados e oponentes cibernéticos do ativismo feminista por Lívia Gaudencio

OPINIOM

É posible unha fotografía sostíbel? por Verónica Ramilo Graña

Non sendo o ideal, nin tan mal! por Naiara González Fontenla e Noelia Darriba García

Tecer saúde comunitária em contextos de virtualidade: oportunidades e desafios por Maria Fidalgo